Am 11. September 1560 wurde dem Markt Zwiesel durch Herzog Albrecht V. ein Wappen zugesprochen. Der Text der Verleihungsurkunde lautet wörtlich:

»Von Gottes genaden Wir Albrecht Pfalzraue bei Rhein Hertzog in Obern und Niedern Bayrn Bekhenen als ainiger regirender Fürst und thuen khundt aller menigelich mit disem offnen brivue das wir guetlich angesehen, wargenommen und betracht haben solich erbarkeit, redlichait schiklichait guet sitten, tugent und vernunft, damit unnser lieb getrewer Rath und Burger des Markhtes Zwisl berüemt werden auch die angenemen getrewen nützlichen Diennst so sy unsern vorfarrn und uns bisher willigelich gethan, und sich hinfüran zuthun gehorsamblich erpieten und darumb mit wohlbedachtem muete guetem rathe und rechtem wissen gedachten Rath und Burgern und allen Iren nachkhumen dise nachgeschriben wappen und Kainat Nemblich ainen Roten Schildt, der Innen ainnenen Gelen oder golldtfarben Sparrn, wellicher sich mit seinen Zwayen Egkhen aufwürz, biß zum obern vordern und hindtern ort des Schillts erstrikhet, der Innen von fueß auf, ainem gewapnetem Khürisser, mit seinen beeden fuessen und spörn gleich von einander und einen Dolchen an seiner gerechten seitten, miten Im schildt aufrecht steendt, mit ainem abgelitten Gennspauch, zwaien runden schwebscheiben, stehenten kragen und part, auch einen offenen alten Eisenhuet, in seiner rechten handt ain schwert, mit gelem oder golldtfaubene knopff und kreutz, und in seiner schwartzen schaiden, oben und unten mit gelem oder golldtfarbem beschlecht, und seinem spitz oder orth under sich neben seinem rechten fueß und in seinem linkhen handt ainen dreyegkheten Schilldt, wellicher im grundt mitten bis oben gleich abgetailt ist, das vorder gel oder goldfarb, der Innen ain schwarzer halber Reichs Adler, und im hindtern thail ailf weiße oder silberfarbe, und zehen plawe oder Lasurfarbe wekhlein diuidieret oder eingetailt, Erscheinennd, mit seinem undtern egkh oder spitz neben seinem linkhen fueß haltendt er genedigklich verlihen und gegeben haben verleihen und geben Jur auch die also, aus Fürstlicher macht hiemit wissentlich, in krafft diß brieffs, Mainen und wellen, das Sy nun für und für in ewig Zeit die Jetz gemelten wappen und Klainet in gemains Markhtes Zwisl ehrlichen handlung und sonst nach notturfft desselben, als sich in solichen gepürt, und fromen redlichan leuten wol zursteet one aller menigelichs — Irrung und andern, die in solicher massen vorgewappnet waren, an Irem wappen unschedlich und ununergriffenlich alles trewlich one geuerde, des zu warem urkhund und ewiger gedechtnus, haben wir vorgedachten Rath, und Burgern des Markhtes Zwisl disen brivue mit unserm anhengenden sekret Innsigl besiglt. Geben in unser Stat München Pfintztags den Ailfften des Monats Septembris als man zelet nach Christi unseres lieben herrn und seligmachers gepurde. Tausen fünfhundert und Sechtzig Jare, Albrecht von Bayern.«